Gamlak Vakna 31

 

Midian-te Thukna leh Vante Sian'thosakna

1 Topa in Moses kiangah, 2“Israel mite' phu Midian-te tungah la in. Tua khit ciangin na mipihte kiang na zuan ding hi,” a ci hi.

3Tua ahih ciangin Moses in mite kiangah, “Midian-te' tungah Topa' phulakna a sem ding, Midian-te a do dingin note' lak panin mi pawlkhat galhiam guan' un. 4Israel minamte nam khat panin mi tul khat ciat gal sungah na kuansak ding uh hi,” a ci hi.

5Tua ahih ciangin Israel mi tul tampi sung panin minam khatah tul khat, tul sawm leh tul nih galdo dingin galhiam kiguan' hi. 6Moses in amaute, minam khat panin tul khat ciat, biakinn nate leh pataukohna dingin peengkulte siampi Eleazar' tapa Finehas kengsakin ama makaihna tawh gal sungah a kuansak hi. 7 Topa in Moses a thupiak bangin Midian-te do uh a, pasal khempeuh that uh hi. 8Amaute in midangte leh Midian kumpi ngate Evi, Rekem, Zur, Hur, leh Reba a thahna uhah, Beor' tapa Balaam zong namsau tawh that khawm uh hi.

9Israel-te in Midian nupite leh a tate uh manin, a bawngte, a tuuhonte khempeuh leh a na khempeuh uh laksak uh hi. 10Amau' ten'na a khuapi khempeuh uh leh a giahphual khempeuh uh mei tawh halsak uh a, 11a matsa khempeuh uh, mihing ganhing ciahpih khin uh hi. 12Tua ciangin amaute in Jerikho nai, Jordan kiang, Moab zanglei-a a giahphual uha Moses leh siampi Eleazar leh Israel mihonte kiangah a galmatte uh leh a na lakte uh tun'pih uh hi.

13Moses, siampi Eleazar, leh mihon makaite khempeuh zong giahphual pua-ah vai dawn dingin pai uh hi. 14Galdona panin a hong ciah mi tul tampi a ukte leh mi za tampi a uk galkap uliante' tungah Moses heh hi. 15Moses in amaute tungah, “Numei khempeuh hingkhawi na hi uh hiam? 16En un, hih mite in Balaam' lamlahna tawh Peor-ah Topa' tungah Israel mite zuautatsak hi. Tua ahih manin Topa' mihonte lakah gimna hong tung hi. * 17Tua ahih ciangin tu-in, a khangnote lakah pasal peuhmah that un la, pasal tawh a lumkhawmsa numei peuhmah zong that un. 18Ahih hangin pasal tawh a lumkhawm nailo nungaknote khempeuh note-a' dingin kem un. 19Tu-in note lakah mi khat peuhpeuh a thatte leh a kithatsa a lawng mi peuhmahte, giahphual pua-ah ni sagih sung om un. A ni thum ni leh a ni sagih ni-in note leh na galmatte uh na kisian'suah ding uh hi. 20Puan khempeuh, savun tawh a kibawl na khempeuh, keel mul tawh a kibawl na khempeuh, leh sing tawh a kibawl na khempeuh na sian'suah ding uh hi,” a ci hi.

21Siampi Eleazar in galdona-ah a va kuan galkapte tungah, “ Topa in Moses a thupiak thukham ngeina hih bang ahi hi: 22Kham, ngun, sumngo, sik, dal, leh haknaw, 23mei a dozo peuhmahte bek mei-ah na hal ding uh a, a siang hi ding hi. Ahi zongin mei a do zolo peuhmahte, nitna sian'suahna tui tawh kisian'suah ding a, tui-ah na sawp ding uh hi. 24A ni sagih ni-in na puante uh na sawp ding uh a, note a siangtho na hi ding uh hi. Tua khit ciangin giahphualah nong ciahkik thei pan ding uh hi,” a ci hi.

Van Hawmna

25 Topa in Moses kiangah, 26“Nang leh siampi Eleazar leh mihon beh lutangte in gal sunga a kiman mihing leh ganhingte sim un. 27Gal sunga a kingahte khen nih suah in la, galdo dingin a kuan galhangte leh inn-a om mihonte tungah a kikimin hawmsak in. 28Galdo dingin a kuankhia galkapte' tung panin mite, bawngtalte, late, leh tuuhonte za nga ciangin Topa' siah dingin khat ciat la in. 29Alang a ngah uh sung panin la in la, Topa' tungah biakna-in siampi Eleazar tungah pia in. 30Israel mihonte in alang a ngah uh sung panin mite, bawngtalte, late, tuuhonte, ganhing khempeuh, sawmnga ciangin khat ciat la in la, Topa' biakbuk a kem Levi mite tungah pia in,” a ci hi. 31 Topa in Moses a thupiak bangin Moses leh siampi Eleazar in a sem uh hi.

32Tu-in galkapte in a lak gal sunga a mat uh a omlai a kihawm dingte: Tuu tul zaguk leh tul sawmsagih leh tul nga, 33bawng tul sawmsagih leh tul nih, 34la tul sawmguk leh tul khat, 35leh pasal tawh a lumkhawm nailo nungak a vekpi-in tul sawmthum leh tul nih ahi hi. 36Alang ahi, gal sungah a kuankhia mite' ngah pen tuu tul zathum leh tul sawmthum leh tul sagih leh zanga hi a, 37 Topa' tuusiah pen tuu zaguk leh sawmsagih leh nga ahi hi. 38Bawngte tul sawmthum leh tul guk hi a, Topa' siah sawmsagih leh nih ahi hi. 39Late tul sawmthum leh zanga hi a, tua sung panin Topa' siah sawmguk leh khat ahi hi. 40Nungak tul sawm leh tul guk hi a, tua sung panin Topa' siah nungak sawmthum leh nih ahi hi. 41 Topa in Moses a thupiak bangin Moses in siampi Eleazar' tungah Topa biakna ding siah a pia hi.

42Galdo dingin a kuankhia mite-a' dingin Moses in a khenkhiat zah mah Israel mihonte in ngah uh a, 43mihonte in a ngah alang teng pen tuu tul zathum leh tul sawmthum leh tul sagih leh zanga, 44bawng tul sawmthum leh tul guk, 45la tul sawmthum leh zanga, 46nungak tul sawm leh tul guk ahi hi. 47Israel-te in a ngah alang sung panin Moses in mihing leh ganhing sawmnga ciangin khat ciat la-in, Topa in ama tungah a thupiak bangin Topa' biakbuk a kem Levi mite tungah a pia hi.

48Tua ciangin galkap tul tampite tunga uliante ahi, tul tampi a ukte leh za tampi a ukte, Moses kiangah hong pai uh a, 49“Kote' ukna nuai-a a om galkapte, na nasem kote in ka sim khin uh a, kote' kiang panin mi khat zong a pelhem omlo hi. 50Kote in Topa' mai-ah ko-a' dingin kilemna bawlna ding, Topa biakna dingin kham tawh a kibawl nate, banbuhte leh taute, min gelhna zungbuhte, bilbahte, leh khite ka muh ciat uh kong puak uh hi,” hong ci uh hi. 51Moses leh siampi Eleazar in amaute' tung panin na-a a kibawl khamte a sang uh hi. 52Tul tampi a ukte leh za tampi a ukte' tung panin a kingah, Topa' tungah biakna-in a piak uh khamte khempeuh shekel tul sawm leh tul guk leh za sagih leh sawmnga a gik hi. 53(Gal sunga a kuan mite in amau-a' ding ciat a la uh hi.) 54Moses leh siampi Eleazar in tul tampi leh za tampi a uk mite' tung panin khamte sang uh a, Israel mite-a' dingin Topa' mai-ah phawk tawntungna-in kikhopna buk sungah a koih uh hi.