Thupatna

Johan Laikhak Masa in ngimna nih nei a, tuate in: A laikhak a simding mite, Pasian leh a Tapa Jesuh Khrih tawh kipawlin a nuntakna dingun hanthotna, leh hih a kipawlna uh a susia ding thuhilhna manlote a zuihlohna dingun hilhkholhna ahi hi. Hih thuhilhna manlo pen, hih leitung tawh kisawhkhakna hangin siatna piang ahih manin Pasian' Tapa Jesuh zong mihing taktak hi theilo ding hi, ci-in upna panin a hong piang ahi hi. Hih thuhilh sia manlote in, hotkhiatna ngah i cih ciangin hih leitungah i nuntakna lunghihmawhna panin suahtakna hi a, hotkhiatna i cih pen gamtat hoih cihte ahi a, lawm leh gualte it ding cih thute tawh ahi zongin a kizopna omlo hi, ci-in a hilh uh hi.

Hih thuhilhna manlo a nialna-in hih laikhak a gelhpa in, Jesuh Khrih pen mihing taktak mah hi a, Jesuh umin Pasian a it mi khempeuh in khatlekhat ki-itna a neihding uh ahi hi, ci-in a limgen hi.

Tom Lakna
Thupatna    1:1-4
Khuavak leh khuamial    1:5—2:20
Pasian tate leh Dawimangpa tate    3:1-24
Thuman leh thukhial    4:1-6
Itna neihding tavuan    4:7-21
A gualzo upna    5:1-21

Johan Masa 1

 

Nuntakna A Piathei Thu

1Leitung pian'cil lai peka kipanin a omsa ahi nuntakna a piathei Thu tawh kisai, note kiangah ka hong gelh uh hi. Kote mahmah in ama thugen ka za uh a, ka mit mahmah uh tawh amah mu-in, limtakin ka ettel uh hi a, ka khut mahmah uh tawh ka lawn' uh ahi hi. * 2Hih nuntakna pen a kimuthei a hong suah ciangin kote mahmah in ka mu uh hi. Tua ahih manin kote tungah a hong kilak, Pa Pasian tawh a omkhawm tua nuntak tawntungna pen genbelin nei-in, note tungah zong a hong gen ka hi uh hi. * 3Pa Pasian leh a Tapa Jesuh Khrih tawh kote pawlkhatin ka om uh mah bangin note zong kote tawh pawlkhat nong suahtheihna ding uh deihna-in ka muhsa uh leh ka zaksa uh thute a hong gen ka hi uh hi. 4Kote' lungdamna a cingtaak theihna dingin hih lai a hong gelh ka hi uh hi.

Pasian, Khuavak Hi

5Ama kiang panin za-in note tungah ka hong gen uh thu in: Pasian, khuavak hi a, khuamial tawh kizopna themkhat zong nei hetlo hi. 6Tua ahih manin Pasian tawh ka kipawl hi, ci napi-in khuamial tawh kisai gamtatnate i gamtat leh i kampauna leh i gamtatna tawh zuauthu a gen ihi hi. 7Ahi zongin amah, khuavak ahih mah bangin eite in zong khuavak gamtatnate i gamtat takpi leh eite pawlkhat ihi a, ama Tapa Jesuh' sisan in i mawhna khempeuh panin eite hong siangsak hi.

8Mawhna ka nei kei hi, i cih leh eite a kineihkhem ihi a, eite a thutaklo ihi hi. 9Ahi zongin Pasian kiangah i mawhnate va pulak lehang, amah citakin thuman ahih manin, i mawhnate hong maisakin i hoihlohnate khempeuh hong siangsak ding hi. 10Pasian in a mawh hi, hong ci ahih manin eite in ka mawh ngei kei hi, i cih leh Pasian pen zuaugen a suaksak ihi a, i sungah ama thu a om hetlo ahi hi.