Thupatna

Joshua Laibu sungah Moses a laihpa Joshua makaihna tawh Israel mite in Kanaan gam a simna thu kigelh hi. Hih laibu sungah a kigelh thupiang a liante sungah Jordan gun kantanna, Jerikho khuapi a kilakna, Ai khua-ah gal kidona, leh Pasian leh a mite in thu a ciam phat kikna uh kihel hi. Hih laibu sungah a kithei kim pen thu khat in, “Kua' na sem ding cih thu tuni-in teel un. Kei leh ka innkuanpihte in ahih leh Topa' na ka sem ding uh hi,” (24:15) a cihna thu ahi hi.

Tom Lakna
Kanaan gam a kizawhna    1:1—12:24
Gam hawmna    13:1—21:45
         1. Jordan gun nisuahna lam gam    13:1-33
         2. Jordan gun nitumna lam gam    14:1—19:51
         3. Bukna khuapite    20:1-9
         4. Levi mite khuapite    21:1-45
Nisuahna lam gama teng mite a gam uhah ciah    22:1-34
Joshua' kamvaikhakna    23:1-16
Shekhem khua-ah thuciam bawlphat kikna    24:1-33
 

Joshua 1

 

Kanaan Lakna ding Kigin'nate

1 Topa' nasem Moses a sih khit ciangin Topa in Moses' nasem, Nun tapa Joshua kiangah, 2“Ka nasempa Moses si ta ahih ciangin tu-in ding in la, nang leh hih mite khempeuh, hih Jordan kantanin Israel mite tungah ka piak gam sungah pai un. 3Moses tungah ka ciamsa bangin na khe in a totna mun khempeuh nang tungah kong pia hi. 4Sehnel gam leh hih Lebanon panin gun lianpi Eufratis gun dong, ni a tumna lama Tuipi Lian lam, Hit mite' leitang khempeuh nangma gam hi ding hi. 5Na nuntak sung tawntung kuamah in na mai hong khak zolo ding hi. Moses tawh ka om mah bangin nang tawh zong kong om ding hi. Nang kong tamasak kei ding a, kong nusia kei ding hi. * * 6Thahat in la, hang in; bang hang hiam cih leh amaute piak dingin a pu a pate uh tungah ka ciam leitang hih mite na luahsak ding hi. * 7Thahatin hang in la, ka nasem Moses in nang hong piak thukhamte khempeuh tawh kizui-in na gamtat ding limtakin ngaihsun in. Na paina peuhah hoihtakin na lamzan' theihna dingin tuate khat zong pelh kei in. 8Hih thukham laibu na mangngilh ngei kei ding hi. A sunga kigelh thute khempeuh tawh kizui-in na gamtat theihna dingin sunlezanin na lungngaingai ding hi. Tua hi leh na ma vang ding a, na nasep tangtung ding hi. 9Thu hong pia khin hilo ka hi hiam? Thahat in la hang in. Lau kei in la lungkia kei in; bang hang hiam cih leh na paina peuhpeuhah Topa na Pasian nang tawh hong om hi,” a ci hi.

10Tua ciangin Joshua in mi makaite thu pia-in, 11“Giahphuaah pai un la, mite thu pia-in, ‘Na lam-an ding uh kigingkhol un; bang hang hiam cih leh Topa na Pasian un na neih dingun note hong piak leitangah pai-in a luah dingin ni thum sungin hih Jordan a galkah ding na hi uh hi,’ ci un,” a ci hi.

12Tua ciangin Joshua in Reuben mite, Gad mite, leh Manasseh minam a langte tungah, 13“ Topa' nasem Moses in note thu hong piakna kammal, ‘ Topa na Pasian un note tawlngakna mun hong pia-in, hih leitang note hong pia ding hi,’ a cihna thu phawk un. 14Moses in Jordan galkhata note hong piak leitangah na zite uh, na taneute uh, leh na ganhingte uh a na om ding uh hi. Ahih hangin note lakah galhang mi khempeuh in hiam tawi-in Jordan kantanin na sanggamte uh mai-ah pai-in, 15note hong piak bangin Topa in na sanggamte uh tungah tawlngakna pia-in, Topa na Pasian un amaute a piak leitang amaute in zong a luah mateng uh na huh ding uh hi. Tua ciangin note' neih leitangah ciahkikin, Topa' nasem Moses in Jordan gal ni a suahna lamah note hong piak leitang na luah ding uh hi,” a ci hi. * 16Amaute in Joshua dawngin, “Kote nong thupiak khempeuh ka hih ding uh a, nong sawlna peuhpeuhah ka pai ding uh hi. 17Na khempeuhah Moses' thu ka man' uh mah bangin nangma thu zong kong mang ding uh hi. Moses a ompih mah bangin Topa na Pasian in nang hong ompih ta hen! 18Na thupiakna leh na thute, na thupiak peuhpeuh hong langpangin a manglo mipa kithat ding hi. Thahat in la hang in,” a ci uh hi.