Thupatna

Peter' Laikhak Nihna pen Khristian suak masate tampi a huam dingin a kikhak ahi hi. A lunghihmawh bulpi in, a manlo thuhilh siate' nasepna leh tua bang thuhilhna hangin a piang gamtat hoihlo zulhtatnate dalna ding ahi hi. Hih bang buaina a bei theihna dingin Pasian leh Topa Jesuh Khrih a mantakin theihna, leh Jesuh mahmah mu-in a thugen a za mite' genna hangin a kithei thute kisam hi. Khrih hong paikik nawnlo ding hi, ci-in a gen mite' thuhilhnate, ama lunghihmawh bulpi khat ahi hi. Pasian in mi khat beek a siatding deihloin, mi khempeuh a mawhna panun a kisikkik ding uh deih ahih manin Khrih hong paikik hak ahi hi, ci-in a gen hi.

Tom Lakna
Thupatna    1:1-2
Khristian omzia ding hong kideihzia    1:3-21
A manlo thuhilh siate    2:1-22
Khrih hong pai nunungna ding thu    3:1-18

Peter Nihna 1

 

Hopihna

1Jesuh Khrih nasem leh sawltak ahi keimah Simon Peter in—-

Eite' Pasian leh Honpa ahi Jesuh Khrih a thumanna hangin kote' upna zah mahin upna manpha a nei mite tungah lai ka hong khak hi.

2Pasian leh i Topa Jesuh na theihna uh hangin hehpihna leh nopsakna thupha note tungah tampi tak hong tung ta hen.

Note Hong Kisapna leh Hong Kiteelna

3Ama minthan'na leh a hoihnate a neikhawm dingin a hong sampa i theihna hangin Pasian' deih bangin biakna mantak i nuntak theihna dingin ama vangliatna in eite' kisap na khempeuh a hong pia hi. 4Amah in piakdingin a hong ciam a manpha mahmah nate hih bangzia-in hong pia a, hih ama hong piak nate hangin leitungah a om siatna a piangsak thei duhluatna leh deihluatnate panin na suakta uh a, Pasian' pianziate na nei uh hi. 5Hih thu hangin na upna ban uhah gamtat hoihna na behlap un la, na gamtat hoihna uh thutheihna tawh na behlap un; 6na thutheihna uh pumpi ki-ukzawhna tawh na behlap un la, na pumpi ki-ukzawhna uh thuakzawhna tawh na behlap un; na thuakzawhna uh Pasian' deih bangin gamtatna tawh na behlap un la, 7Pasian' deih bangin na gamtatna uh sanggam ki-itna tawh na behlap un; na sanggam ki-itna uh itna thukpi tawh na behlapzawhna dingun na hanciam un. 8Hih bang hoihnate a kicingin na neih uh leh i Topa Jesuh Khrih na theihna uhah thahatin kiman'na na nei ding uh hi. 9Ahi zongin hih bang hoihna a neilo mite pen mittaw-in a gamla a mu theilo mite hi a, a mawhna lui uh panin a siangkhin ahihlam uh zong a mangngilh ta ahi uh hi.

10Tua ahih manin sanggamte aw, Pasian in note hong sapna leh hong teelna-ah a kip taktak na hihna dingun hahkat mahmah un. Tua bangin hahkat le uh cin na puk ngei kei ding uh hi. 11Tua hi leh eite' Topa leh Honpa Jesuh Khrih Uk tawntungna sungah nuamtakin na lut thei ding uh hi.

12Tua ahih manin note in hih thute thei khinin, na theihsa uh thumanah kiptakin na omkhin uh ahi zongin a hong phawksak kikkik ka hi hi. 13Ka nuntak laiteng hih thute ka hong phawksak kikkik ding thuhoih khat hi, ci-in ka ngaihsun hi. 14I Topa Jesuh Khrih in teltakin hong genkhin ahih manin hih leitung pumpi ka nusiat baihna ding thu ka thei hi. 15Tua ahih manin ka sih khit ciangin hih thute na phawkkik kik theihna dingun ka hihtheih zahin ka hanciam ding hi.

Khrih' Minthan'na Vang, Mit tawh a Mute

16I Topa Jesuh Khrih a vangliatna leh a hong paikikna ding thute note kiangah ka hong gen uh ciangin mihingte' phuahtawm tuanthute siksanin a hong gen hiloin, ka mit mahmah uh tawh ka muh uh a vangliatnate a hong gen ka hi uh hi. 17Vanglian Minthangpa in, “Hih pen ka it ka Tapa hi a, ama tungah ka lung a kim mahmah hi,” ci-in genin, Pa Pasian in ama tungah minthan'na vang leh pahtawina a piak laitakin komau pumpi mahmah tawh a om ka hi uh hi. 18Mual siangtho tungah amah tawh ka omkhawm laitakun vantung panin hong ging awte komau mahmah in ka za uh hi. *

19Tua ahih manin kamsangte' gen thute a man taktak ahihna thu ka teltheih uh hi. Note' lungsimah Zingsol hong suakin khua a hong vak matengin khuamial laka mei taang bangin hih thute ngaihsun le uh cin hoih mahmah ding hi. 20Na phawkding uh a thupi mahmah khat in: Lai Siangtho sunga om thugen kholhnate, kuamah in ama pilna tawh a khiatna gen theilo hi. 21Bang hang hiam cih leh mihingte in a deih manin mailam thugenkholh theihna a kingah hilo a, Kha Siangtho' sawlna tawh Pasian' kiang panin a hong pai thute a kigen ahi zaw hi.