Thupatna

Sawltak Tangthu pen Luka Gen Lungdamna Thu tawh a thu a kizomto ahi hi. A ngimna bulpi in, Kha Siangtho' makaihna tawh Jesuh' nungzui cilte in ama hangin a kingah Lungdamna Thu, “Jerusalem khuasung, Judea gamsung, Samaria gamsung khempeuh, leh leimong dongin,” a kizelhsakna ziate a gennopna bulpi ahi hi (1:8). Tua thu pen Jew mite lakah Khristian thu a kipat khiatna leh a thu hong paisuakin, leitung mi khempeuh' upna a hong suahna thu ahi hi. Hih thu a gelhpa in Khristiante pen leitung ki-ukna thu-ah Rom kumpi gam a siasak ding mite hiloin, Khristian upna pen Jew biakna a kicingsak ahihna thu, hih lai a simte in a theihding a deihna bulpi ahi hi.

Sawltak Tangthu pen khen thum bang kisuah thei a, Jesuh' hanga Lungdamna Thu a kigenna hong zai semsemin, pawlpi a kiphuhna thute ahi hi.

1. Jesuh a vankah khit ciangin Jerusalem khuasungah Khristian thu hong kipat khiatna.

2. Tua banah Palestine gamsungah a kizelhna.

3. Tua banah Mediterranean Tuipi khengin Rom ciangdongah a kizelh laina thu ahi hi.

Sawltak Tangthu sungah a kigen a thupi khat in, Pentekos pawi ni-in Jerusalem khua-ah a om thu umte kiangah vangliatna tawh a hong tung Kha Siangtho' nasepna leh hih laibu sungah a kiciamteh pawlpi leh a makaite lamlakin a thahatsak laina thu ahi hi. Khristian cilte' thugen pen thuhilhna khat peuhpeuhah kihuam khin thei a, Sawltak Tangthu sungah a kiciamteh thupiangte in thu umte' nuntakna sung leh pawlpi tawh kipawl khawmnate-ah Khristian thu in vang a neihna hong lak hi.

Tom Lakna
Teci pan'na ding kithawi kholhna    1:1-26
1. Jesuh' thupiak nunung leh a kamciam    1:1-14
2. Judas a laihpa    1:15-26
Jerusalem khuasungah teci pan'na    2:1—8:3
Judea gam leh Samaria gamsungah teci pan'na    8:4—12:25
Paul' nasepna    13:1—28:31
1. Thuhilh khualzin masakna    13:1—14:28
2. Jerusalem khua-a thu vaihawmna    15:1-35
3. Thuhilh khualzin nihna    15:36—18:22
4. Thuhilh khualzin thumna    18:23—21:16
5. Jerusalem, Sisaria, leh Rom khua-ah Paul a thongkiatna    21:17—28:31

Sawltak Tangthu 1

 

Kha Siangtho Kikham

1-2Lawm Theofilas aw, Lai ka hong gelh masakna sungah Jesuh in nasep a kipat tunga kipanin vantungah amah a kilaktoh hun ciangdong, a thuhilhna leh a septe khempeuh cingtakin ka gelh hi. Ama sawltak dingin a teelsa mite, Kha Siangtho tung tawnin thu a vaikhak khit ciangin vantungah amah kilato hi. * 3Ama sih khitzawh ni sawmli sung amaute tungah tam veipi kilang a, amah a nungta taktak ahihna teltakin a kithei ahi hi. Amaute in amah mu uh a, Pasian' Ukna thu amaute tungah a gen hi. 4Amaute tawh a omkhawm laitakin amah in amaute kiangah, “Jerusalem khua panin paikhia kei un la, note kiangah ka hong gensa ka Pa' hong kamciam thu na ngak un. * 5Johan in tui sungah mite phum a, ahi zongin a sawtloin Pasian in Kha Siangtho tawh note hong kidimsak ding hi,” ci-in thu a pia hi. *

Vankahna

6Tua bangin Jesuh tawh a omkhawm laitakun sawltakte in Jesuh kiangah, “Topa aw, tutungin Israel minamte tungah ukna aana na piakik ding hiam?” ci-in a dot uh ciangin 7Jesuh in, “Ka Pa in ama thu tawh a sehsa hun leh nite, cik ciangin hong tungding cih thu note' theihding thu hilo hi. 8Ahi zongin note tungah Kha Siangtho hong tun' ciangin vangliatna tawh na kidim ding uh a, Jerusalem khuasung, Judea gamsung, Samaria gamsung, leh leimong dongin note in keima thu na gen ding uh hi,” ci-in a dawng hi. * 9Hih thu a genkhit ciangin amaute' muhtangpi mahin vanah Jesuh kilato a, meiipi in liah ahih manin amah mu thei nawnlo uh hi. *

10Tua bangin Jesuh a kilaktoh ciangin amaute in vantung lam enenin a om laitakun amaute kiangah puanpak a silh mi nih hong dingvat a, 11“Galilee mite aw, bang hangin vantung lam enin ding niloh na hi uh hiam? Note kiang panin vantungah a kilato hih Jesuh pen, vantungah a paitoh na muh uh bang teekteek mahin khatvei hong paisuk kik ding hi,” a ci uh hi.

Judas A Laih Dingpa Kiteel

12Tua ciangin Jerusalem pan tai lang bang a gamla tua Oliv Mual tung panin Jerusalem-ah sawltakte a ciahkik uh hi. 13Jerusalem a tun' uh ciangin amauteng, Peter, Johan, James leh Andru, Filip leh Thomas, Bartholomew leh Matthai, Alfeas' tapa James, Simon (gam khualpa), leh James' tapa Judas a tun'na uh inn dei-ah a kahto uh hi. * 14Numeite, Jesuh' nu Mary, leh Jesuh' naute tawh thungen khawm dingin a kikhawm zelzel uh hi.

15Tua khit a sawtloin thu um mi za khat leh sawmnih bang a kikhop khawm laitakun Peter hong dingin thu hong gen a, 16“Lawmte aw, Jesuh a mante lam a lak Judas thu, Kha Siangtho in David' kam panin a genkholhna Lai Siangtho sung thu a tun'ding kisam hi. 17Judas pen eite tawh na a semkhawm dingin a kiteelkhia ahih manin eima pawl mi ahi hi.

18(“Tu-in hih mipa in a gitloh gamtatna thamanin a ngah sum tawh amah in lo khat lei a, tua lo sungah kia-in a si hi. Amah kitamzan a, a sungkua khempeuh kithehkek hi. 19Jerusalem khuasunga teng mi khempeuh in hih thu za uh a, amau' pau-in tua lo pen ‘Akeldama,’ ci uh hi. Akeldama a khiatna in, ‘Mi Thahna Lo,’ a cihna ahi hi.) *

20“Bang hang hiam cih leh Late Laibu sungah,

• ‘Ama ten'na mun gamdai hen la,
  • tua munah kuamah teng kei hen,’
    kici a, tua banah,
• ‘Ama nasep
  • midang khat in sem ta hen,’
    ci-in kigelh hi. *

21-22“Tua ahih ciangin Topa Jesuh' thawhkikna thu teci pangin a hong genpih dingin Judas tangin mi khat i lakding kisam hi. Tua mipa pen Johan' tuiphum kipat huna kipanin Jesuh vanah a kilaktoh hun ciangdong, Jesuh' nasepna khempeuhah eite tawh a omkhawm mi khat ahih ding kisam hi,” a ci hi. *

23Tua ciangin amaute in Josef (min dang nih a nei, Barsabbas leh Justas zong a kicipa) leh Matthias a pulak uh hi. 24-25Tua ciangin amaute in thu ngen uh a, “Mihing khempeuh' lungsim sung thu a thei Topa aw, ama omna dingin a kilawm munah a om dingin sawltak nasep panin a hong paisan Judas tangdingin, hih mi nih sung panin na teel penpen hong hilh in,” a ci uh hi. 26Tua ciangin a teelna dingun lai ai san uh a, Matthias in ngah ahih manin sawltak sawmlekhatte tawh a kisim khawm pah hi.