Thupatna

Thukhente Laibu sungah Kanaan gam a kisim huna kipan kumpi a neih hun kikal sung uh Israel mite ngeina nei loin a phengtat uh hun sunga thupiangte a om hi. Amau minam sung pan “Thukhente” a cih uh galhang pawlte in mi dangte a sukna thu vive hi a, thukhen min a puak uh hangin a taktakin a tamzaw pen galkap makai hizaw uh hi. Hih makaite sung panin a kithei kim pen khat in Samson hi a, a lian 13-16 sungah ama nasepnate kiciamteh hi.

Hih laibu sung panin a phawkhuai thu in: Pasian tungah Israel mite a thutak loh uh ciangin haksatna thuak uh a, a thutak uh ciangin a ma uh nawt paisuak zo uh hi. Ahi zongin tua banah phawk ding thu in: Pasian' tungah Israel mite thutak loin haksat a tuah hun uh ciang nangawnin amaute kisikin ama lamah kihei kik le uh amaute a honkhia dingin Pasian na kiging tawntung hi.

Tom Lakna
Joshua a sih hun dong thupiangte    1:1—2:10
Israel thukhente    2:11—16:31
Thupiang tuamtuamte    17:1—21:25
 

Thukhente 1

 

Judah leh Simeon in Adonibezek Man

1Joshua a sih khit ciangin Israel mite in Topa tungah thu dong uh a, “Kanaan mite a sim dingin kua kuanto masa ding ka hi uh hiam?” a ci uh hi. 2 Topa in, “Judah minamte kuanto masa ding uh hi. En un, amau' khutsungah tua leitang ka piazo hi,” a ci hi. 3Tua ciangin Judah minamte in a sanggam uh Simeon minamte kiangah, “Kanaan mite i zawh theihna dingin ko tungah hong kipia gamah kote hong zui un. Tua mah bangin no hong kipia gamah kote in zong kong zui ding uh hi,” a ci uh hi. Tua ahih ciangin Simeon minamte in a zui uh hi. 4Tua ciangin Judah minamte kuanto uh a, Topa in amaute' khutsungah Kanaan mite leh Perez mite a pia hi. Amaute in Bezek-ah tua mite tul sawm bang a zo uh hi. 5Amaute in Bezek-ah Adonibezek tuakin amah tawh kido uh a, Kanaan mite leh Perez mite a zo uh hi. 6Adonibezek tai hi. Ahih hangin amaute in delhin man uh a, a khutpite leh a khepite attan uh hi. 7Tua ciangin Adonibezek in, “A khutpi leh a khepi a ki-attan kumpi sawmsagihte in ka sabuai nuai-ah an nengkia tawm ngei uh hi. Ka gamtatnasa bangin Pasian in kei hong thuk hi,” a ci hi. Tua ciangin amaute in Jerusalem-ah amah paipih uh a, tua munah amah a si hi.

Judah Minamte in Jerusalem leh Hebron Zo

8Tua ciangin Judah mite in Jerusalem simin la uh a, a mite thatin a khuapi hal uh hi. 9Tua khit ciangin Judah mite, mualtung gam, Negeb gam, leh lei niamna-a teng Kanaan mite a sim dingin paisuk uh hi. 10Tua ciangin Hebron (Hebron pen a nidangin Kiriatharba)-ah a teng Kanaan mite a sim dingin Judah mite kuansuk uh a, amaute in Sheshai leh Ahiman leh Talmai a zo uh hi.

Othniel in Debir zo-in Aksah Ngah

(Joshua 15:13-19)

11Tua lai panin Debir mite a sim dingin amaute a pai uh hi. Debir min pen nidangin Kiriathsefer ahi hi. 12Tua ciangin Kaleb in, “Kiriathsefer simin a lazopa tungah a zi dingin ka tanu Aksah ka pia ding hi,” a ci hi. 13Tua ciangin Kaleb' naupa Kenaz' tapa Othniel in la a, amah in a zi dingin a tanu Aksah a pia pah hi. 14Tuanu tawh a kiten' ciangin a pa kiang panin lo khat a ngetna ding a zi hahsawl hi. A zi zong a la tung panin kum a, Kaleb in ama kiangah, “Bang ut na hi hiam?” a ci hi. 15Amah in, “Letsong khat hong pia in. Negeb lei keu gamah hong koih na hih ciangin tuikhukte zong hong pia in,” a ci hi. Tua ciangin Kaleb in ama tungah tuikhuk tungnungte leh tuikhuk nuainungte a pia hi.

Judah leh Benjamin' Zawhna Ciang

16Tua ciangin Moses' sungpate nam ahi Ken' suanlekhakte, Judah mite tawh nisuh khuapi panin Negeb gam Arad gei-a om Judah gamah paito uh a, tua lai munah tungin tua mite tawh a tengkhawm uh hi. 17Judah mite zong Simeon mite tawh paikhawmin Zefath-ah a teng Kanaan mite va zo-in susiamang uh hi. Tua ahih ciangin tua khuapi min Hormah kici hi. 18Judah mite in zong Gaza leh a gam, Ashkelon leh a gam, leh Ekron leh a gamte a la uh hi. 19 Topa in Judah mite huh ahih manin amaute in mualtung gamteng luah uh a, ahih hangin zang gama teng mite hawlkhia zolo uh hi. Bang hang hiam cih leh amaute in sik leeng nei uh hi. 20Tua ciangin Moses in a gensa bangin Kaleb tungah Hebron kipia a, tua sung panin amah in Anak' tapa thumte a hawlkhia hi. * 21Ahih hangin Benjamin mite in Jerusalem-ah a teng Jebus mite hawlkhia lo uh ahih manin tuni dongin Jebus mite pen Jerusalem-ah Benjamin mite tawh a tengkhawm uh hi. *

Josef Minamte in Bethel Zo

22Josef minamte zong Bethel a sim dingin kuanto uh a, Topa in amaute a huh hi. 23Amaute in thu kansim dingin Bethel-ah mi sawl uh hi. (Tua khuapi min pen a nidangin Luz ahi hi.) 24Thu kansimte in khuapi panin hong paikhia mi khat mu-in ama kiangah, “Khuapi sung lutna lampi hong hilh in, kong thum uh hi, nang tungah kong diktat ding uh hi,” a ci uh hi. 25Tua ciangin amah in khuapi sung lutna lampi amaute a lak hi. Amaute in namsau tawh tua khuapi mite vat uh a, ahih hangin tua mipa leh a innkuante suaktasak uh hi. 26A nung ciangin Hit mite gamah tua mipa pai-in khuapi khat sat a, a min pen Luz ci-in a phuak hi. Tudongin tua khua min pen Luz mah ahi hi.

Manasseh leh Efraim' Zawhna Ciang

27Manasseh mite in Bethshean leh a khuaneute-a teng mite, Taanak leh a khuaneute-a teng mite, Dor leh a khuaneute-a teng mite, Ibleam leh a khuaneute-a teng mite ahi a, Megiddo leh a khuaneute-a teng mite ahi zongin hawlkhialo uh ahih manin Kanaan gammite tua leitangah tenglai uh hi. 28Ahi zongin Israel-te a thahat uh ciangin amaute in aana tawh na a sem dingin Kanaan mite koih uh a, hawlkhia sianglo uh hi. *

29Efraim mite in zong Gezer-ah a teng Kanaan mite hawlkhia lo uh ahih manin Gezer-ah amaute' lakah Kanaan mite a teng uh hi. *

A Namdangte' Zawhna Ciang

30Zebulun minamte in Kitron-a teng mite ahi a, Nahalol-a teng mite ahi zongin hawlkhia lo a, Kanaan mite amaute lakah tengin aana tawh nasemte a suak uh hi.

31Asher minamte in Akko-a teng mite, Sidon-a teng mite, Ahlab-a tengte, Akzib-a tengte, Helbah-a tengte, leh Afik-a tengte ahi a, Rehob-a tengte ahi zongin hawlkhia lo uh hi. 32Tua gama teng Kanaan mite lakah Asher mite teng uh hi. Bang hang hiam cih leh amaute in hawlkhia lo uh hi.

33Naftali minamte in Bethshemesh-a tengte ahi a, Bethanath-a tengte ahi zongin hawlkhia loin, tua gama teng Kanaan mite lakah a teng uh hi. Ahi zongin Bethshemesh leh Bethanath-a teng mite pen amaute-a' dingin aana tawh na a sem mite a suak uh hi.

34Amor mite in mualtung gamah Dan mite notkik uh a, zang gamah paisuk saklo uh hi. 35Amor mite pen Harheres, Aijalon, leh Shaalbim-ah teng uh a, ahih hangin Josef minamte in amaute gawt semsem a, amaute pen aana tawh nasemte a suak uh hi. 36Amor mite' gamgi pen Akrabbim kahtohna, Sela leilu lam pan kipan hi.